Пайғамбаримиз саллаллоҳу алайҳи васалламдан ўгит: Муомала эҳтиёжи

Бир киши Расули Акрамнинг саллаллоҳу алайҳи васаллам ҳузурларига киришга рухсат сўради.

- Бу одам шунчалар ёмонки, қавми ва яфинлари юзларида ҳам катта доғдир, - дедилар Расули акрам саллаллоҳу алайҳи васаллам. 

Бироқ у ичкари кирганида очиқ чеҳра билан муомала қилдилар. Чиқиб кетгач, бошқа бир киши киришга рухсат сўради. 

- Нақадар яхши инсон. Оиласи ифтихор қилгулик фарзанд, - дедилар Сарвари олам, саллаллоҳу алайҳи васаллам. Лекин унга аввалги одамга кўрсатилганчалик илтифот қилмадилар. У ҳам чиққач, Оиша онамиз розиаллоҳу анҳу: 

- Ё Расулаллоҳ, биринчи кишини ёмон дедингизу, унга яхши муомала қилдингиз. Иккинчисини яхши деб таърифлаб, унча илтифот этмадингиз,- деб сўради. 

- Эй Оиша, инсонлар орасида шундайлар борки, феъли ёмон бўлгани учун улардан эҳтиёт бўлиш керак, - дедилар Пайғамбаримиз, саллаллоҳу алайҳи васаллам.

Манба: ЎМИ расмий сайти