БМТ Қочқинлар идораси матбуот хизматининг хабар беришича, бугун, 15 декабрь куни идора томонидан Ўзбекистоннинг Термиз шаҳри орқали Афғонистонга гуманитар юклар жўнатилди.

Маълум қилинишича, юклар Ўзбекистон ҳукумати кўмагида Термиз юк марказида ташкил этилган БМТ Қочқинлар бўйича олий комиссарлигининг гуманитар марказидан жўнатилган.

«Биз БМТ Қочқинлар бўйича Олий комиссарлигига энг зарур бўлган вақтда инсонпарварлик ёрдамини кўрсатишда кўмаклашаётган Ўзбекистон ҳукуматининг доимий ёрдамини қадрлаймиз. Ҳозир миллионлаб афғонлар озиқ-овқат таъминотидан маҳрум бўлиб, қаҳратон қишдан омон қолиш учун ўта заиф бўлиб қолган бир пайтда, одамларнинг ҳаётини сақлаб қолиш ва гуманитар инқирознинг олдини олиш учун шошилинч ёрдам талаб этилади», – деди БМТ Қочқинлар бўйича Олий комиссарлигининг алоқалар бўйича катта ходими жаноб Франк Ремус.

Қайд этилишича, гуманитар ёрдамга ошхона жиҳозлари ва пластмасса чойшаблар каби 40 тоннага яқин асосий ёрдам буюмлари киради.