Бирлашган Араб Амирликлари (БАА) 50 та F-35 қирувчи самолётлари ва 18 та учувчисиз учиш аппаратларини сотиб олиш бўйича АҚШ билан келишув имзолади.  

Reuters агентлигининг хабар беришича, ушбу келишув АҚШнинг янги президенти Жозеф Байденнинг инаугурация маросимидан бир соат аввал имзоланган.  

АҚШ Давлат департаменти БААга 23,37 миллиард доллар эвазига 50 та F-35 самолётлари, 18 MQ-9B разведкачи учувчисиз учиш аппаратлари ва бошқа замонавий қуролларни сотмоқчи эканлиги ҳақида ўтган йилнинг ноябрида Конгрессни хабардор қилган эди. 

F-35 самолётининг лойиҳасида АҚШдан ташқари Австралия, Британия, Дания, Италия, Канада, Нидерландия, Норвегия ва Туркия ҳам қатнашган. Бироқ ўтган йили Вашингтон Анқарани ушбу лойиҳадан чиқариб юборишга қарор қилди, бунга эса Туркиянинг Россиядан С-400 ҳаво мудофаа тизимини сотиб олгани сабаб бўлди. 

Ушбу қирувчи самолётнинг харидорлари орасида Исроил ва Япония ҳам бор.