Афғонистоннинг собиқ президенти Ҳамид Карзай Associated Press агентлигига берган интервьюсида АҚШни танқид остига олди. Унинг айтишича, Америка Афғонистонга экстремизмга қарши курашиш ва у ерда барқарорлик ўрнатиш учун келган эди, бироқ қарийб йигирма йил кейин ҳар икки йўналишда ҳам муваффақиятсизликка учраган кўйи кетмоқда.

Карзайнинг фикрига кўра, Афғонистонда экстремизм энг юқори чўққисига етган, хорижий қўшинлар эса ўзларидан фалокатни қолдириб кетяпти.

“Биз афғонистонликлар ўз муваффақиятсизлигимизни тан оламиз, хўш, йирик кучлар ва давлатлар-чи? Улар бизни қаерга ташлаб кетяпти? Тўлиқ шармандалик ва фалокатга”, – деди собиқ президент.

Айни пайтда у хорижий кучларнинг Афғонистонни тарк этиши афғон халқининг фойдасига бўлишини таъкидлади. Карзайнинг айтишича, афғонистонликлар ватанларини ўзлари ҳимоя қилиши зарур.