АҚШ Давлат департаменти расмийлари мамлакатнинг Яман бўйича махсус вакили Тим Лендеркинг Саудия Арабстони, БАА ва Уммонни ўз ичига олган Форс кўрфазига сафарини бошлагани, унинг жамоаси аъзолари Иорданияга йўл олганини маълум қилди. Бу ҳақда "Reuters" агентлиги маълум қилди.

Вазирлик баёнотига кўра, махсус вакил ва унинг жамоаси "жорий йилнинг апрел ойидан бери амалда бўлган сулҳни узайтириш ва доимий ўт очишни тўхтатиш ва можарога кенг қамровли ва доимий ечим йўлини топиш"га эътибор қаратмоқчи.

Лендеркинг Шабвадаги сўнгги тартибсизликлар, тинчликни тиклаш ва яманликларга қўшимча молиявий ёрдам кўрсатиш зарурлигини муҳокама қилиши режалаштирилган.

Хабар қилинишича, АҚШ жорий йилнинг ўзида Яман ҳукуматига 1 миллиард доллардан ортиқ гуманитар ёрдам кўрсатган ва Вашингтоннинг Ямандаги гуманитар ёрдамга қўшган умумий ҳиссаси саккиз йил аввал инқироз бошланганидан бери қарийб 5 миллиард долларни ташкил этган.

2022 йил 2 апрелда Бирлашган Миллатлар Ташкилоти воситачилигида сулҳга эришилди. Август ойида жаҳон ташкилоти ўт очишни тўхтатиш режимини яна 2 ойга узайтиришини эълон қилди.