Қирғизистоннинг собиқ президенти Аскар Акаев Бишкекка қайтди. Маҳаллий ОАВ хабарига кўра, у Миллий хавфсизлик давлат қўмитасига олиб борилган.
Идоралараро тергов гуруҳи «Қумтор» олтин кони лойиҳасини амалга оширишдаги коррупция ҳолатлари бўйича Аскар Акаевни қидирувга берган эди. У 1992 йилда “Қумтор” олтин кони лойиҳа бўйича бош келишувни тузиш, 1994 йилда бош келишувга ўзгартириш киритиш ҳамда 2003 йилда “Камеко” компанияси билан бош келишувни қайта тузиш бўйича айбланган ва унга қарши жиноят иши очилган.
Собиқ президент Миллий хавфсизлик давлат қўмитаси томонидан олиб борилган чора-тадбирлар натижасида Бишкекка олиб келингани айтилмоқда. Акаев шу пайтгача Москвада яшаб келган ва Россия уни Қирғизистонга топширишни истамаётган эди.
Аскар Акаев 1990 йилдан Қирғизистонни бошқаришга киришган. 2005 йилдаги Лола инқилоби пайтида Россияга қочиб кетган ва ўша ерда илмий фаолият билан шуғуллана бошлаган.
