Бирлашган Араб Амирликлари (БАА)нинг Исроилдаги элчихонаси Тель-Авив шаҳрида очиладиган бўлди.
БААнинг расмий WAM агентлиги хабарига кўра, кеча, 24 январь куни Абу-Дабида Дубай амири Муҳаммад ибн Рашид ал-Мактум бошчилигида ҳукумат йиғилиши ўтказилган. Ана шу йиғилишда мамлакатнинг Исроилдаги элчихонасини Тель-Авивда очишга қарор қилинган. Шу куни Абу-Дабида Исроил элчихонаси ўз фаолиятини бошлади.
Бироқ БАА элчихонаси қурилиши ва дипломатик миссия фаолияти айнан қачон бошланиши ҳақида ҳозирча маълумот йўқ.
БАА ҳукумати ўтган йилнинг сентябрида Исроил билан дипломатик алоқа ўрнатгандан бери элчихона Қуддусда очиладими ёки Тель-Авивдами деган баҳс-мунозаралар тинмаётган эди.
Исроил Қуддусни ўз пойтахти деб ҳисобласа-да, халқаро ҳамжамият буни тан олмаган. Қуддусда фақатгина АҚШ ва Гватемаланинг элчихонаси бор, қолган давлатларнинг элчихонаси Тель-Авивда жойлашган.
