Буюк Британия 10 январдан бошлаб Ўзбексистонда берилган коронавирусга қарши эмланганлик тўғрисидаги сертификатларни расман тан олади. Бу ҳақда «Дунё» ахборот агентлиги хабар берди.
Хабарга кўра, Буюк Британияга сафар қилаётган Ўзбекистон фуқаролари хорижга чиқишдан камида 14 кун олдин тўлиқ вакцинация курсини ўтаган бўлсалар, эмланганлик тўғрисидаги сертификат ҳақиқий ҳисобланади.
Шунингдек, Буюк Британияга кириш учун қуйидаги вакциналардан бири билан эмланганлик бўлиш шарт эканлиги қайд этилган:
- Covaxin;
- Moderna;
- Janssen (битта доза);
- Novavax (Nuvaxovid ва Covovax);
- Oxford/AstraZeneca;
- Pfizer/BioNTech;
- Sinopharm Beijing;
- Sinovac-CoronaVac.
Бироқ, Ўзбекистонда энг кўп қўлланилаётган ZF-UZ-VAC 2001 хитой-ўзбек вакцинаси улар орасида мавжуд эмас.
«Вакцинация сертификатига эга бўлган Ўзбекистон фуқаролари эндиликда Англия ҳудудига кириш учун ПЗР тестини тақдим этишлари керак бўлмайди ва улар 10 кунлик карантин ўтиш талабидан озод қилинади. Бундан ташқари, Британия ҳудудига киргандан сўнг ПЗР тест ўрнига анча арзонроқ турувчи ИФА-тест (lateral flow test) топширилади», – дейилади хабарда.
