Германиянинг Айхштетт шаҳрида жойлашган католик черкови XV-XVIII асрларда қарийб 400 кишини жодугарликда айблаб ўлдиргани учун узр сўради.
Independent нашрининг ёзишича, Европада “жодугарлар ови” авж олган даврда қарийб 60 минг киши ўлдирилган. Қурбонларнинг тахминан 25 минг нафари Германияга тўғри келади.
“Жодугарлар” шафқатсизларча қийноққа солиниб қатл этилган. Танқидчилар анчадан бери черковни ушбу жиноятларни тан олишга чақириб келади.
Айхштеттдаги католик черкови епископи Грегор Мария Ханке ниҳоят бу масала ҳақида гапириб, айбсиз одамларнинг ўлдирилишини “черков тарихидаги қон оқиб турган яра” деб атади.
Cобиқ пастор Хартмут Хегелер 2011 йилда бошлаган кампания доирасида элликдан ортиқ шаҳар “жодугарлар ови”даги ҳиссаси учун узр сўради. “Черков ислоҳотлардан қўрқар эди, “жодугарлар”ни суд қилиш эса бунга қарши курашнинг бир усули бўлган”, – дейди у. Хегелернинг айтишича, черков католицизмдан юз ўгирганларни иблис билан тил бириктиришда айблаган ва бу айблов черковнинг фойдасига хизмат қилган.