Рамазон ҳайитидан кейин Сурия пойтахти Дамашқда Саудия Арабистони элчихонаси қайтадан иш бошлайди. Бу ҳақда Лондонда чиқадиган Rai Al Youm газетаси хабар тарқатди.
Элчихонанинг очилиш маросимида Саудия Арабистони Ташқи ишлар вазири Файсал ибн Фарҳон ал-Сауд бошчилигидаги делегациянинг иштирок этиши кутилмоқда.
Хабарда айтилишича, ўн йиллик танаффусдан кейин икки давлат ўртасидаги алоқаларни яхшилаш ҳақидаги қарор Саудия Арабистони хавфсизлик хизмати раҳбари Холид ал-Хмайдоннинг Сурия президенти Башар Асад билан душанба кунги учрашувидан кейин қабул қилинган. Учрашувда Сурия миллий хавфсизлик хизмати раҳбари Али ал-Мамлук ҳам иштирок этган.
Сурия 2011 йилнинг ноябрида Араб давлатлари лигасидан чиқариб юборилган. Аксар араб давлатлари Дамашқдан элчиларини чақириб олди ва Сурияга қарши иқтисодий бойкотга қўшилди. Саудия Арабистони уруш даврида Сурия мухолифатини қўллаб-қувватлаб келди.
