Эрон ҳукуматининг расмий вакили Али Рабиий ядрошунос олим Муҳсин Фахризоданинг ўлдирилишига алоқадор шахслар аниқланганини маълум қилди. “Бу ҳақда “Анадолу” агентлиги хабар бермоқда. 

Рабиийнинг айтишича, Эрон Разведка ва миллий хавфсизлик вазирлиги қотилликка алоқаси бор шахсларни аниқлашга муваффақ бўлган. “Жиноят ҳар томонлама ўрганиб чиқилди ва суриштирувлар якунлангач, керакли чоралар кўрилади”, – деди у. 

30 ноябрь куни Эрон Разведка ва миллий хавфсизлик вазири Маҳмуд Алавий қотиллик бўйича далиллар қўлга киритилганини айтган, бироқ тафсилотларни ошкор қилмаган эди. 

Эслатиб ўтамиз, Эрон ядровий дастурида муҳим ўрин тутган шахслардан бири бўлган Муҳсин Фахризода 27 куни Теҳрон яқинида суиқасдга учради. Мамлакат раҳбарияти ушбу қотилликда Исроилни айблади.