Фаластин оммавий ахборот воситалари Фейсбук тармоғи цензура қўллаётганидан ва Фаластин ҳақидаги контентни ўчириб ташлаётганидан норози. 

The New Arab нашрининг хабар беришича, Фаластин оммавий ахборот воситалари ўз норозилигини билдириш мақсадида шанба куни Фейсбукка икки соатлик бойкот эълон қилди. Акцияда Фаластин телевидениеси, Quds News Network ва Shehab ахборот агентлиги, Palestine Today TV ва яна бир қанча медиа ташкилотлари қатнашди. 

Ўтган йилнинг майида Фейсбук тармоғи фаластинлик ўнлаб фаоллар ва журналистларнинг аккаунтларини ҳеч бир сабабсиз ўчириб ташлаган, бу ишини фақатгина мазкур аккаунтлар умумий стандартларга жавоб бермагани билан изоҳлаган. 

Ижтимоий тармоқларда Фаластин билан боғлиқ контент цензурасини кузатиб борадиган Sada Social лойҳаси доирасида аниқланишича, Фейсбукда араб давлатларининг Исроил билан алоқа ўрнатишини танқид қилган Фаластин ва араб саҳифаларидаги контентнинг ўқувчиларга етиб бориш даражаси ўтган ойда бирданига пастлаб кетган.  

Фейсбук Фаластин билан боғлиқ контентнинг цензура қилиниши учун Исроил билан ҳамкорлик ўрнатган ҳамда ўтган йилнинг июнида цензура бўйича исроиллик эксперт Эми Палморани кузатув кенгаши аъзолигига қабул қилган.