Флорида губернатори Рон Десантис АҚШ Федерал сайлов комиссиясига 2024 йилги президентлик сайловлари учун номзодлик билдиришномасини топширди, дея хабар бермоқда Associated Press.
Агентлик маълумотларига кўра, губернатор ўзининг пойгага қўшилиши ҳақида бизнесмен Илон Маск билан Twitter Spaces платформасида жонли эфирда расман эълон қилади.
44 ёшли Рон Десантиснинг АҚШ Республикачилар партиясидаги обрўси тобора кўтарилиб бормоқда. 2015 йилдан 2018 йилгача у Вакиллар палатасининг аъзоси, кейинроқ Флорида губернатори бўлган. 2022 йилда Десантис губернатор сифатида бир қатор қонунларни, жумладан, абортларни чеклаш, қурол олиб юришни осонлаштириш ва трансгендерлик операцияларини тақиқловчи қонунларни имзолаган. Сайловда у деярли 20% кўп овоз билан иккинчи муддатга қайта сайланди.
Яқинлашиб келаётган президентлик сайловларида Десантис собиқ президент Доналд Трамп билан Республикачилар партиясидан номзодлик учун курашади.
