“Ҳақиқат аҳли доимий хавфда бўлган”

23:00 29.03.2019 1175

Абу Бакр розияллоҳу анҳу жаннат сари юриб, ҳатто бир оёқлари жаннатга кирганда ҳам, то иккинчиси кирмагунча хотиржам бўлмасликларини айтганлар. Аллоҳнинг макридан* қўрққанликлари сабаб шундай деганлар.

Нафсларида яширин ёмонликни Аллоҳ таоло охирги сонияларда очвориб, абадий дўзахга киришдан қўрққанликлари учун айтганлар. Шундай ёмонликки, Абу Бакр нафсларидаги бу ёмонликни ё билганлар ёки билмаганлар.

Бу – тақвонинг чўққиси.
Бу – Аллоҳдан хавф.
Бу – тавозеъ. Ва нафснинг поклиги, тозалиги ва нуқсонсизлигидан хотиржам бўлолмаслик.
Бу – яхши амаллардан ғурурланмаслик. Имтиҳонда тўсатдан шарманда қилиши мумкин бўлган яширин иллатлардан қўрқиш.

Абу Бакр даъво аҳлидан бўлмаганлар, ўзларига даража ва солиҳликни даъво этмаганлар. Балки аҳли ҳақиқатдан бўлганлар.

Ҳақиқат аҳли доимий хавфда бўлган. Ўзларидаги ўзлари билмаган яширин ҳақиқат очилиб қолиб, ҳалокатга етаклашидан қўрқишган. Улар нафслари қаршисида титрашган.

Ва Аллоҳ олдида титроқда бўлишган.

Бу – нафс ва Аллоҳ ҳақидаги ҳақ илм туфайлидир.

Доктор Мустафо Маҳмуд

***

*Аллоҳнинг макри – инсонларда бўладиган салбий маънодаги макр эмас. Балки Ўз душманларининг макрига муносиб жавоб беришидир. Нафс ҳам кишини шариатдан чиқишга ундаб, душман сифатида ҳаракатланганда, Аллоҳнинг макрига учраши мумкин.

Мубашшир АҲМАД

Azon.uz янгиликларини Telegram'да ҳам кузатиб боринг!