Хабар қилинишича, бир шайх масжидда ваъз ўқир ва ҳозир бўлганларнинг аксарияти бадавийлардан бўлган экан. У ўз мавъизасида: "... агар улар калтакесак инига кирсалар" сўзлари бўлган ҳадисни эслатиб ўтди ва кейин: "Буни Табароний келтирган" деди.

У ерда бўлганлардан бири: "Эй шайх, Табароний калтакесак келтирдими?" – деб сўради.

Шайх: "Йўқ, у ҳадисни келтирган", деди.

Иккинчиси: "Калтакесак иниданми?" – деб савол берди.

Шайх: “Йўқ, биродар. Келтирди дегани, айтди деганидир".

Учинчиси давом этди: "Хўш, калтакесакка нима бўлди?"

Шайх: "Калтакесак - бу мажозан олинган, ўхшатиш", – деди.

Тўртинчисиям ортда қолмай савол қилди: "Яъни, калтакесак Табаронийга тегишли эмасми?"

Шайх: "Йўқ, биродар, Табаронийда ҳеч қанақа калтакесак бўлмаган!"

Бешинчиси сўради: "Яхши, демак Табароний калтакесакни бировдан олганми?"

Шайх жиғибийрони чиқиб ҳайқирди: "Агар сизлар учун яна ваъз ўқиш учун келсам, Аллоҳ менинг жонимни олсин!"

Ёқуб Умар тайёрлади