Хусийлар Саудия Арабистонидаги аэропортни нишонга олди

22:30 12.06.2019 2157

Ямандаги исёнчи ҳусийлар Саудия Арабистонининг Абҳа шаҳридаги халқаро аэропортга ракета билан ҳужум уюштирди. Бу ҳақда Al Arabiya телеканали Саудия Арабистони бошчилигидаги халқаро коалицияга таянган ҳолда хабар тарқатди. 

Ҳусийлар отган ракета Абҳа аэропортининг учиб келиши залига тушган. Ҳодиса натижасида 26 киши яраланган, уларнинг орасида чет элликлар ва болалар, жумладан, уч нафар яманлик ҳам бор. 

Халқаро коалиция вакили Туркий ал-Маликий мазкур ҳодисани ҳарбий жиноят деб атади ва бу «ҳусийлар Эрондан замонавий қуроллар олганининг исботи» эканини таъкидлади. 

Аввалроқ ҳусийлар Саудия Арабистонининг Жизон шаҳридаги аэропортга ҳам ҳужум қилган эди. 

Эслатиб ўтамиз, ҳусийлар Яман ҳукуматига қарши исён кўтарган бўлиб, бир неча йилдан бери икки ўртада уруш кетяпти. Саудия Арабистони бошчилигидаги халқаро коалиция эса бу урушда Яман ҳукуматини қўллаб-қувватлаяпти. 

Azon.uz янгиликларини Telegram'да ҳам кузатиб боринг!