“Анадолу” агентлигининг хабар беришича, Ливаннинг шимолий ва жанубий ҳудудларида мамлакатдаги ижтимоий-иқтисодий вазиятнинг ёмонлашишига қарши норозилик намойишлари бўлиб ўтди.
Триполи шаҳрида ёшлар пойтахт Байрутга элтадиган йўлни тўсган, шунингдек, шаҳарнинг бир қатор марказий кўчаларида тошлар ва тўсиқлар барпо этган. Шунга ўхшаш ҳолат Аккар туманида ҳам кузатилган. Жанубдаги Сайда тумани аҳолиси эса электр ва сув таъминотидаги узилишларни ҳамда ёқилғи тақчиллигини бартараф этишни талаб қилган. Намойишчилар айрим кўчаларни ёпиб қўйган.
Ливан айни пайтда 1975-1990 йиллардаги фуқаролик урушидан кейинги энг оғир иқтисодий инқирозни бошидан ўтказмоқда. Мамлакатдан пул чиқиб кетишининг олдини олиш мақсадида банклар қатъий чораларни қўлламоқда, чет элга пул ўтказмалари 2019 йилнинг октябрида тўхтатилган, аҳоли доллардаги омонатларини олишга қийналяпти.
