Исроил Украинага учувчисиз парвоз аппаратларига қарши курашда қўлланилувчи тизимларни сотиш учун экспорт лицензияларини тасдиқлади. Улар ёрдамида Россия жангда қўллаётган Эрон дронларига қарши курашиш мумкин, деб ёзади Axios Исроил ва Украина расмийларига таяниб.
Россия Украинага бостириб кирганидан бери Киевга биринчи марта шундай тизимлар жўнатилади. Нашр суҳбатлашган манбаларнинг маълум қилишича, феврал ойи ўрталарида, Бош вазир Бенямин Нетаняху кўрсатмаси билан Исроилнинг бу урушга муносабати қайта кўриб чиқилаётган пайтда, Мудофаа вазири Йоав Галлан ва ташқи ишлар вазири Эли Коэн бу келишувга рухсат берган.
Лицензиялар Elbit ва Rafael компаниялари учун берилди. Расмийларнинг фикрича, бу сиёсий қадам Исроил сиёсатидаги ўзгаришни англатмайди, чунки улар берилаётган техника мудофаа характерига эга ва ўт очиш учун ишлатилмайди. Қолаверса, бу тизимларни Киевга тақдим этиш Исроил манфаатларига ҳам жавоб беради. Чунки Исроил ҳарбий муҳандислари шу баҳона бу тизим Эрон дронларига қарши урушда қанчалик самарали эканини ҳам текшириб олишмоқчи.
Авваллари расмий Тел-Aвив Украинага ҳарбий ёрдам бермасликка ҳаракат қилиб, бу Россия билан кескинликни келтириб чиқариши ва Исроилнинг Суриядаги хавфсизлик манфаатларига зарар етказишидан қўрқиб келган.
Дронга қарши тизимлар 40 км. масофага етувчи таъсир кучига эга. Уларни электр станциялари ёки шунга ўхшаш муҳим объектлар яқинига ўрнатиш ҳам мумкин.
Украина Мудофаа вазирлиги делегацияси аллақачон Исроилга ташриф буюриб, ушбу тизим тақдимотида иштирок этган уларни сотиб олиш заруриятини баҳолаган. Лекин ҳали шартнома имзоланмаган. “Украина бу тизимлардан манфаатдор, бироқ улар унчалик аҳамиятли эмас, чунки ҳозиргача бу тизимсиз ҳам дронларнинг 75-90% ни уриб туширишга муваффақ бўляпмиз. Бизга ҳозир баллистик ракеталарга қарши мудофаа тизими зарур бўляпти”, деган украиналик расмий.
Январ ойида Исроилнинг Германиядаги элчиси Рон Просорнинг айтишича, Исроил Украинага одамлар “кўзидан четда” ҳам катта миқёсда ёрдам бермоқда. “Исроил армияси Эрондан Сурия ва Ливанга қурол-яроғ, жумладан, Россия Украинада қўллаётган Эрон дронлари ва ракеталарини етказиб беришига мунтазам равишда тўсқинлик қилиб келяпти”, деди дипломат.
Расмий равишда Исроил Украина президенти Владимир Зеленскийнинг илтимослари ва AҚШ маъмуриятининг босимига қарамай, Киевга фақат гуманитар ёрдам кўрсатишни тасдиқлайди, қурол етказиб беришдан бош тортиб келади.
Ноябр ойида Исроил НAТО мамлакатларига Украинага Исроил компонентларини ўз ичига олган қурол тизимларини етказиб беришга рухсат берди, шунингдек, бир неча миллион доллар қийматдаги "стратегик материаллар"ни молиялаштиришга рози бўлди.
