Пайшанба куни собиқ исроиллик аскар Шарқий Қуддусдаги Ал-Ақсо масжиди дарвозасининг 56 йил аввал ўғирлаб олган калитини қайтариб берди, деб хабар бермоқда Анадолу.
Қуддусдаги Исломий вақф ва хайрия департаменти бош директори Шайх Аззам ал-Хатиб Яир Барак исмли шахсдан калит олгани акс этган видеони чоп этди.
Видеода Барак Шарқий Қуддус фронтида жанг қилаётган Исроил батальонининг бўлганини айтиб, 1967 йилдаги жангларда унинг кўплаб сафдошлари ҳалок бўлганини айтган.
“Ал-Мағрибий дарвозасига (Масжиди Ақсонинг ғарбий йўлагида) етиб келганимда чап тарафга қараб калитни топиб олдим. Нега унга қўлимни қўйиб, олиб кетганимни билмайман”, - дейди у.
“Калитни чўнтагимга солиб қўйдим, ўшандан у менда”, — дея қўшимча қилган у.
Баракнинг айтишича, 40-50 йилдан кейин у ҳали ҳам калит унда турганидан ўзини ноқулай ҳис қила бошлаган, “мен уни ўғирлагандим, энди уни қайтаришга қарор қилдим.
Мана мен шу ердаман. Ўғирланган калитни эгаларига қайтариб бердим... ва Исроил ҳам шундай қилиши керак - фаластинликларга ўз ерларини, ҳуқуқларини, ҳурматини, мустақиллигини, эркинлигини ва хавфсизлигини қайтариб бериши лозим", деб айтган собиқ аскар.
Унинг сўзларига кўра, калитни қайтариб берганидан кейин ўзини тўғри йўл тутганини ҳис қилган.
1967 йилда Шарқий Қуддуснинг ишғол қилинишини нишонлаш учун ўтган ҳафта исроиллик кўчманчилар ўнлаб исроиллик амалдорлар билан бирга “байроқ марши”га қўшилганида у калитни қайтариб берди.
Мазкур жанжалли юриш ҳақида фикр билдирар экан, у бу кун ўзи учун йилнинг энг ёмон кунларидан бири эканини айтиб, “байроқ куни”ни нишонлашни анчадан бери тўхтатганини қўшимча қилган.
Исроиллик кўчманчилар, Исроилнинг 1967 йилда шаҳарни босиб олгани муносабати билан Қуддуснинг бирлашишини хотирлаш учун ҳар йили “байроқ марши”ни ўтказади.
"Ўша куни мен унинг бир қисми бўлган эдим. Қуддусни босиб олганимдан пушаймонман", дейди таассуф билан у.
Исроил 1967 йилги араб-исроил уруши пайтида Шарқий Қуддусни босиб олди. 1980 йилда Исроил бутун шаҳарни аннексия қилди ва бу халқаро ҳамжамият томонидан ҳеч қачон тан олинмаган.
