Жанозани кўтариш ва дафн қилиш ҳақида фасл (Енгил фиқҳ)

14:05 07.08.2019 701

Жанозани кўтариш фасли

Маййитни тобутига олишса, унинг тўрт томонидан кўтаришади ва йўртмаган ҳолда тезроқ юришади. Қабр бошига етиб боришса, тобут одамлар елкасидан тушмасдан бурун ўтиришлари макруҳ бўлади.

Дафн қилиш ҳақида фасл

Қабрни қазиб, лаҳад қилинади. Маййитни қибла томондан киргизилади. Уни лаҳадига қўювчи: “Бисмиллаҳи ва ала миллати расулиллаҳи” деб қўяди. Юзини қиблага қаратади ва кафанидан тугунини ечади. Сўнг лаҳадни хом ғишт билан текислаб беркитади. То лаҳад хом ғишт билан текислангунча, аёл кишининг қабри ёпиб турилади. Эркакнинг қабри ёпиб турилмайди. Қабрни пишган ғишт ва ўтин билан маҳкамлаш макруҳ. Қамишнинг эса зарари йўқдир. Сўнг тупроқ ташлаб, қабр дўмса қилинади, текисланмайди.

"Енгил фиқҳ" китоби
Мубашшир Аҳмад

Azon.uz янгиликларини Telegram'да ҳам кузатиб боринг!