Жиззахда Қозон федерал университетининг филиали очилади. Тегишли фармон Президент Шавкат Мирзиёев томонидан имзоланди.

Филиал 2022/2023 ўқув йилидан ўз фаолиятини бошлайди. Aбитуриентларнинг қарийб 30 фоизи давлат гранти асосида қабул қилинади. Ўқишни тугатгандан сўнг битирувчилар камида уч йил мажбурий ишлаш шарти билан давлат ташкилотларига тайинланади.

Олийгоҳда қуйидаги йўналишлардан таълим берилади:

• иқтисодиёт;
• машинасозлик;
• даволаш иши;
• стоматология;
• дорихона иши.

Ўқитувчилар таркибининг камида 40% чет элдан, шу жумладан Қозон федерал университетидан жалб қилинади.

2021/2022 ўқув йилидан бошлаб Қозон университети Ўзбекистон Миллий университетининг Жиззах филиали билан биргаликда қўшма таълим дастурлари асосида «Дастурий инжиниринг», «Фармацевтика» ва «Aхборот тизимлари ва технологиялари» йўналишлари бўйича кадрлар тайёрлашни бошлайди.

Ушбу йўналишлар бўйича ўқишга қабул қилинган талабалар ўқишни янги филиалда давом эттирадилар.
Қозон университетининг филиали собиқ Олий ҳарбий авиация мактаби биносида жойлашади.