Расмий сафар билан Парижга келган Миср президенти Абдулфаттоҳ Сисий франциялик ҳамкасби Эммануэл Макрон билан учрашди, дея хабар бермоқда Deutsche Welle.
Макрон Мисрнинг минтақада терроризмга қарши олиб бораётган курашини кучсизлаштиришни истамаслигини, шу сабабли Мисрдаги инсон ҳуқуқлари билан боғлиқ вазиятга қарамай, ушбу мамлакатга қурол сотиш давом этишини маълум қилди.
Миср президентининг Парижга сафари арафасида Халқаро амнистия ташкилоти баёнот тарқатиб, Макронни ўзбошимчалик билан қамалган мисрлик сиёсий маҳкумларни озод қилиши учун Сисийга босим ўтказишга чақирган эди.
Музокаралар якунида ўтказилган матбуот анжуманида нутқ сўзлаган Франция президенти бойкот сиёсатининг ўрнига мулоқотни афзал кўришини, чунки мулоқот орқали юқори самарадорликка эришиш мумкинлигини, Мисрга нисбатан ҳам бойкот қўлланмаслигини айтди. Шунингдек, у Муҳаммад алайҳиссалом таҳқирлаб чизилган карикатуралар туфайли Францияга қарши бошланган “нафрат кампанияси”ни қўллаб-қувватламагани учун Сисийга миннатдорчилик билдирди.
