Франция президенти Эммануэл Макроннинг Миср президенти Абдулфаттоҳ Сисийни орден билан тақдирлагани француз жамоатчилигидан яширилгани маълум бўлди.
Жорий ҳафтада Миср президенти Францияга сафар қилди. Макрон Елисей саройида Сисий учун зиёфат берган, шундан кейин унга Франциянинг олий мукофотларидан бири – «Фахрий легион» орденини тақдим қилган. Бу тадбирларнинг тасвирлари Миср телевидениесида намойиш этилган бўлса-да, француз оммавий ахборот воситаларида пайдо бўлмаган. Қолаверса, зиёфат ва орден тақдимоти Франция президентининг кун тартибида қайд этилмаган.
Франциянинг TMC телеканали ушбу тадбирларнинг тасвирларини намойиш этганидан кейин ижтимоий тармоқларда танқидлар янграй бошлаган. Хусусан, инсон ҳуқуқлари ташкилотлари Макроннинг «бир диктаторни қизил пояндоз ёзиб кутиб олганини» таъкидлаган.
