Францияда полиция ходимларининг фото ва видетасвирларини тарқатиш чекланиши мумкин. Европа Комиссия ушбу масала бўйича Парижни огоҳлантириб, журналистлар эркин ва хавфсизликда ишлашлари зарурлигини таъкидлади. Бу ҳақда Deutsche Welle хабар бермоқда. 

Европа Комиссияси Адолат ва фундаментал ҳуқуқлар департаменти матбуот котиби Кристен Виганднинг айтишича, Францияда полиция ходимлари тасвирларининг тарқалишини тақиқлашни кўзда тутувчи қонун лойиҳаси Европа Иттифоқи қонунларига қанчалик мос келишини текширилиши мумкин. 

Мазкур қонун лойиҳаси Франция Ички ишлар вазири Жеральд Дарманен бошчилигида ишлаб чиқилган. Унга мувофиқ полиция ходимлари тасвирларини “жисмоний ва психологик” яхлитлигига зарар бериш ниятида тарқатганлик учун бир йиллик қамоқ ва 45 минг евро жарима тайинланади. Агар қонун кучга кирадиган бўлса, полициячиларнинг юзи акс этган тасвирларни эълон қилиш чекланади. 

Қонун лойиҳасига биринчи навбатда журналистлар қарши чиқди. Уларнинг фикрича, бу ҳужжат билан полициялар журналистларнинг эмин-эркин фаолият кўрсатишига тўсқинлик қилиши мумкин. Қолаверса, полиция ходимларининг вазифасини суиистеъмол қилиш ҳолатларини тасвирга олиб бўлмай қолади. 

Францияда айниқса икки йил аввалги оммавий норозилик намойишлари пайтида полициячиларнинг шафқатсизликлари акс этган кўплаб тасвирлар тарқалган эди.