Минглаб ғазоликларга тиббий ёрдам кўрсатиш керак

08:40 09.05.2019 173

“Буюк қайтиш марши” деб номланган норозилик намойишлари чоғида Исроил ҳарбийлари билан тўқнашув натижасида яраланган фаластинликларга тиббий ёрдам кўрсатиш учун 20 миллион доллар керак бўлади. Охирги 13 ойда қарийб 29 минг фаластинлик яраланди, улардан 7 минги ўқотар қуролдан жароҳат олган, 120 нафардан ортиқ ғазолик оёқ ёки қўлидан айрилган.

Мазкур маълумотларни БМТнинг гуманитар ёрдам координатори Жейми Макголдрик ошкор этди. Унинг айтишича, оғир яраланган 1700 фаластинликка шошилинч тиббий ёрдам кўрсатиш зарур, бунга эса маблағ умуман етмаяпти.

“Ғазода соғлиқни сақлаш тизими абгор аҳволда, – деди у. – Биз ўта муҳтожлар ҳамда умуман тиббиёт муассасаларини қўллаб-қувватлаш учун 20 миллион доллар сўраяпмиз”.

Ўқотар қуроллардан олинган жароҳат туфайли қўли ёки оёғидан айрилганлар орасида 20 нафар вояга етмаган болалар ҳам бор. Ярадорлардан баъзиларига остеомиелит – суяк инфекцияси хавф солмоқда.  

Azon.uz янгиликларини Telegram'да ҳам кузатиб боринг!