Telegram каналимизга аъзо бўлинг
Таҳлил

Мирзо Кенжабек. Янги шеърлар

2004

БОРДЕК БЎЛСИН

Муҳаббатинг ёйгил аҳли муҳаббатга,
Кўнгил аҳли суҳбатингга зордек бўлсин.
Сўзинг дорбоз дори каби бўлсин баланд,
Лек хислатинг кир ёйилган тордек бўлсин.

Шукри беҳад, Раббимнинг ҳақ сўзи – тугал,
Дунё ичра ҳар мавсумнинг ўзи – тугал,
Тўрт фаслнинг баҳор, ёзи, кузи – тугал,
Қиши – қишдек, қорлари ҳам қордек бўлсин.

Ҳар кимсанинг дўсту ёри саноқлидир,
Энг ашаддий душман – икки оёқлидир,
Душманинг-ку аниқ душман сиёқлидир,
Энди дўстинг – дўсту ёринг – ёрдек бўлсин.

Дилда кибру салобатинг йўқ бўлса ҳам,
Ҳақдан ўзга ҳимоятинг йўқ бўлса ҳам,
Молу давлат, бизоатинг йўқ бўлса ҳам,
Киборларнинг кўз олдида бордек бўлсин.

Ҳақ йўлида ҳаво ила юриб бўлмас,
Нафсинг синмай, Ҳақ наздига бориб бўлмас,
Иззат истаб қурбат қасрин қуриб бўлмас,
Бандаликда табиатинг хордек бўлсин...

22.11.2020.

ҚЎРҒОН БОРДИР

То оламда муҳаббату ҳижрон бордир,
Ҳар инсоннинг юрагида армон бордир.
Ҳар қайдаки салом бўлса, бордир видо,
Ҳар қайдаки баҳор бўлса, хазон бордир.

Ким дард чекса, неъмат билур ҳар лаҳзани,
Шифо билгай ҳар гиёҳу ҳар майсани,
Ҳақ таоло жуфт яратди ҳар нарсани,
Умид узма, дард бор жойда дармон бордир!

Гар дуч келсак зулму ситам, бўҳтонга биз,
Парво қилмай ҳеч яхшию ёмонга биз,
Арзу додни айтажакмиз султонга биз,
Гар султонга айтолмасак, Субҳон бордир!

Зиддиятлар очар олам сир-асрорин, 
Ажаб билма золимларнинг кирду корин,
Ахир, энди кўрибсанми дунё корин? – 
Бир яхши бор манзилда бир ёмон бордир.

Қайғу дема сен дунёвий қайғуларни,
Покиза тут охиратлик туйғуларни,
Одат қилма қаҳқаҳаю кулгуларни,
Ён-верингда бирор кўнгли вайрон бордир.

Таъхир қилма, ҳақ сўз учун келганда пайт,
Зулм аҳлига мудом айтар сўзингни айт,
Тупроқ феълли ғарибларга бўлма лоқайд,
Боқгил, ахир, ер устида осмон бордир.

Ҳақ таоло ювса айбу гуноҳимиз,
Севинчларга табдил бўлур дил оҳимиз,
Ноумидлик даргоҳимас даргоҳимиз,
Дард аҳлига Мирзо каби қўрғон бордир!..

21–22.11.2020.

Мирзо Кенжабек

УЛАШИНГ:

Теглар:

Мавзуга доир:

Қорақалпоғистондан расмий баёнот

3 12:34 02.07.2022

“16 миллион украиналик гуманитар ёрдамга муҳтож” – БМТ координатори

35 12:20 02.07.2022

Исроилнинг Эронга оид яширин маълумотлари тарқалиб кетди

310 12:00 02.07.2022

Ғарбий Соҳилдаги тартибсизликларда исроилликлар яраланди

94 11:45 02.07.2022

“Муҳожирлар ташналикдан вафот этган” – ХМТ таассуфда

190 11:15 02.07.2022

Осиё-Тинч океани мамлакатлари темир йўлчилари Қирғизистонда йиғилди

151 10:55 02.07.2022
« Орқага