Буюк Британия суди ҳижобли муслимага спиртли ичимлик сепиб юборган аёлга нисбатан жазо тайинлади, дея хабар бермоқда ITV. 

Ҳодиса Ньюкаслда, ўтган йилнинг 30 апрелида кечки соат олти яримларда содир бўлган. Йигирма беш ёшли Шэннон Торп кўчадан ўтиб кетаётган нотаниш муслиманинг орқасидан ҳеч бир сабабсиз стакандаги спиртли ичимликни сепиб юборган. 

Жабрланувчи ортига ўгирилиб, ундан нега бундай қилганини сўраган. “Мен ҳеч нарса қилмадим, ёмғир ёғди”, – дея жавоб қайтарган Торп сурбетларча. Ваҳоланки, ҳаво очиқ ва Торпнинг қўлидаги стакандан ичимлик томчилаб турган бўлган. 

Суд Шэннон Торп жамоат тартибини бузган деган хулосага келди ва уни 20 ҳафталик қамоққа ҳукм қилди. Бундан ташқари, у 150 фунт жарима тўлашига тўғри келади.