Сурия президенти Башар Асад Дамашқда Бирлашган Араб Амирликлари (БАА) Ташқи ишлар ва халқаро ҳамкорлик вазири Абдуллоҳ ибн Зайд ал-Наҳайён ва у бошчилигидаги делегацияни қабул қилди. Бу ҳақда сешанба куни Суриянинг расмий «САНА» агентлиги хабар тарқатди.
Қайд этилишича, учрашувда томонлар “икки қардош давлат ўртасидаги муносабатлар, турли соҳаларда томонларни қизиқтирган икки томонлама ҳамкорликни ривожлантириш ва айниқса, инвестицион шерикликни мустаҳкамлаш учун ҳаётий муҳим соҳаларда ушбу ҳамкорликнинг янги уфқларини белгилаб олиш масалаларини муҳокама қилди”.
Башар Асад БАА тутган “холис ва тўғри позицияни” олқишлаб, мазкур мамлакат “ҳар доим Сурия халқи томонида бўлганини” таъкидлади.
Бу БААлик юқори мартабали мулозимнинг охирги ўн йилда Сурияга илк сафаридир.
Абу-Даби ва Дамашқ алоқалари Сурияда уруш бошланганидан кейин узилиб қолган эди. БАА Суриядаги элчихонасини 2018 йилнинг декабрида қайтадан очди.
