Оташ ичра Иброҳим: “Аллоҳ паноҳ”, деди...

15:00 17.08.2019 1505

“Замон оғир, қўй болам, замонга боқ”, дедилар,

Худогамас, “тинчгина инсонга ёқ”, дедилар.

 

“Ҳаққимни бер, бу зулм, қайда ҳақиқат?”, десанг,

“Қарши чиқма оқимга, қўшилиб оқ”, дедилар.

 

Масжид борсанг — муртад-у, майхонада валийсан,

Бода тутсанг, “балли!”-ю, йўқса, “гумроҳ”, дедилар.

 

“Ишхона масжид эмас”, ишхона — ишратхона,

Гар намозга чорласанг, “кўнглимиз пок”, дедилар.

 

“Замон зил, замонга боқ...”, бу гаплар янгиликмас,

Аввалам айтгандилар, яна шундоқ дедилар...

 

Аё Ғолиб, чекма ғам, гулханга отсалар ҳам,

Оташ ичра Иброҳим: “Аллоҳ паноҳ”, дедилар.

 

Ғолиб БАҲРОМ

Azon.uz янгиликларини Telegram'да ҳам кузатиб боринг!