АҚШ Давлат котиби Майк Помпеонинг Европага сафари бекор қилинди. Вашингтон буни Оқ уйни янги президент Жо Байденга топширишга тайёргарлик муаммосиз якунлаши кераклиги билан изоҳлаган.
Бироқ Reuters агентлиги тарқатган хабарда айтилишича, европалик расмийлар АҚШ Давлат котибини кутиб олишни истамаган.
Помпеонинг АҚШ давлат котиби сифатида охирги марта Европа Иттифоқи етакчилари ва НАТО Бош котиби билан учрашиши кутилаётган эди. Маълум бўлишича, ЕИ вакиллари АҚШ Конгрессидаги тартибсизликлардан кейин Помпеони кутиб олиш билан уятга қоламиз, деган фикрга келган.
Вашингтон эса Конгрессдаги ҳодисалардан кейин юқори мартабали амалдорлар, хусусан, Майк Помпеонинг хорижга сафарлари бекор қилинганини билдирди.
