Форс кўрфази давлатлари Қатар билан боғлиқ инқирозни ҳал қилиш ва мазкур мамлакатга нисбатан жорий этилган қамални олиб ташлаш бўйича янги ташаббусни кўриб чиқмоқда. Бу ҳақда Қатар ташқи ишлар вазири Муҳаммад ибн Абдураҳмон ал-Тани “Ал-Жазира”га берган интервьюсида маълум қилди.
“Айни пайтда инқирозни ечиш бўйича янги ташаббус таклиф қилинган, унга нисбатан муносабат яхши ва биз у қандайдир қадамлар ташланишига олиб келишига умид қилмоқдамиз”, – деди вазир.
Унинг сўзларига кўра, ўтган йилнинг охирида Саудия Арабистони билан бошланган мулоқот яхши бораётган эди, бироқ номаълум сабабларга кўра тўхтаб қолди. Шунингдек, у Қатар мулоқот учун очиқлигини ҳамда қўшнилар билан келишмовчиликка қарамай минтақанинг олти мамлакатини бирлаштирган Форс кўрфази араб давлатлари ҳамкорлик кенгашининг бирлигига содиқлигини таъкидлади.
Эслатиб ўтамиз, уч йил аввал Саудия Арабистони, БАА, Баҳрайн ва Миср Қатарни террорчиликни қўллаб-қувватлашда айблаб, у билан дипломатик алоқаларни узган ва ушбу мамлакатга нисбатан транспорт қамалини жорий этган эди. Қатар эса айбловларни тан олмаган.
