«Рубин» футбол клубининг туркиялик собиқ ярим ҳимоячиси Гўкдениз Караденизнинг молиявий кўмаги асосида Татаристон пойтахти яқинидаги Висогорский туманида масжид очилади. Футболчи бу ҳақда Туркиянинг Taka Gazete нашрига берган интервьюсида маълум қилган.

«Татаристон президенти Рустам Миннихонов менга ер майдони ажратиб берди ва биз Аллоҳнинг изни билан бу ерда масжид қурдик. Татаристон халқининг истагига кўра, масжид «Карадениз» деб номланди. Масжидга бундай ном бериш менинг илтимосим эмасди, аммо улар шуни таклиф қилишди ва мен рози бўлдим», – деди Гўкдениз Карадениз.

«Рубин» клуби афсонаси Туркия президенти Ражаб Тоййиб Эрдоғанни масжид очилишига таклиф қилишни режалаштираётганини айтган. Ҳали очилиш маросими қачон бўлиши аниқ эмас. Аммо футболчи Эрдоған унинг таклифини қабул қилишига умид қилаётганини айтган. Унинг маълум қилишича, Татаристон халқи Эрдоғанни яхши кўради. 

Шунингдек, Карадениз масжиднинг очилишида Россия Президенти Владимир Путиннинг иштирок этилиши ҳам кутилаётганини маълум қилди.