Россия 5 октябрдан эътиборан Ўзбекистон, Тожикистон, Қирғизистон, Баҳрайн, Ҳиндистон ва Бирлашган Араб Амирликларига мунтазам авиарейслар сонини оширади. Ҳукумат матбуот хизматининг хабар беришича, бу ҳақда Коронавирус тарқалишига қарши курашиш бўйича тезкор штабнинг қарори қабул қилинган.
Қарорга кўра, Москвадан Тошкентга парвозлар сони ҳафтада тўрттага етказилади. Бундан ташқари, Бухоро ва Самарқандга икки марта, Урганч, Наманган, Фарғона, Андижон ва Термизга бир мартадан рейслар амалга оширилади.
Коронавирус инфекцияси тарқалиши муносабати билан Россия 2020 йилнинг 22 мартида бошқа давлатлар билан авиарейсларни чеклаш тўғрисида қарор қабул қилган эди. Бироқ ёзда ушбу чеклов юмшатилди. Кўп ойлар давомида Россия ва Марказий Осиё давлатлари ўртасида фақатгина чартер рейслар амалга оширди, уларнинг ҳар бири учун алоҳида келишишга тўғри келди.
Россия Қирғизистон билан мунтазам авиақатновни ўтган йилнинг декабрида, Ўзбекистон ва Тожикистон билан эса жорий йилнинг 1 апрелида тиклади.
