Саудия Арабистони Исроил билан нормаллашув жараёнига киришнинг йўли Фаластин муаммосини ҳал қилиш эканини эълон қилди.
Бу ҳақда Саудия Арабистони ташқи ишлар вазири Файсал бин Фарҳан Швейцариянинг Давос шаҳрида бўлиб ўтган Жаҳон Иқтисодий форумида айтиб ўтди.
Фарҳан бу борада берилган саволга “Фаластин масаласи ҳал этилмас экан, Саудия Арабистони Исроил билан алоқаларини меёрлаштирмайди” деб жавоб берди.
2002 йилда Байрутда бўлиб ўтган Араб Саммитига ишора қилган Фарҳан Саудия Арабистонининг илк тинчлик ташаббусини амалга оширганлигини ва минтақада Исроил билан тўлиқ нормаллашувга тайёр бўлишини таъкидлади.
Шунингдек, у Фаластин муаммоси ҳал қилинмас экан, алоқаларнинг илиқлашмаслигини, ҳозирги асосий устуворликнинг Фаластин ва Исроил ўртасидаги тинчлик ҳаракатларини тезлаштириш эканлигини ва бунинг Исроил, Фаластин ва минтақага фойда келтиришини таъкидлади.
