Сенегал пойтахти Дакар ва унинг атрофида ўтказилган норозилик намойишлари тартибсизликларга айланиб кетди: намойишчилар давлат мулки ва хусусий мулкка зарар етказган. 

Норозиликлар 3 март куни, мухолифат етакчиларидан бири Усмон Сонконинг ҳисбга олинишини ортидан бошланган. Сонко 2014 йилда асос солинган “Сенегалнинг меҳнат, аҳлоқ ва биродарлик учун ватанпарварлари” партиясининг раҳбари ҳисобланади. У 2019 йилдаги президент сайловида қарийб 16 фоиз овоз тўплаб, учинчи ўринни эгаллаган. Мухолифатчининг фикрича, унга нисбатан таъқиблар навбатдаги президент сайловида унинг қатнашишига йўл қўймаслик билан боғлиқ. 

“Анадолу” агентлигининг хабар беришича, Сенегал Ички ишлар вазири Феликс Диом тартибсизликлар чоғида 4 киши ҳалок бўлганини маълум қилди. У юз берган ҳодисаларни “террорзим” деб баҳолади.