Хабарларга кўра, Исроил хавфсизлик расмийлари молия вазири Бецалел Смотричнинг мунозарали баёнотлари Миср ва Иордания билан алоқаларга путур етказиши мумкинлигидан хавотирда.

Якшанба куни «Диний сионизм» сиёсий альянси раҳбари Смотрич Париждаги конференцияда «Фаластин халқи деган нарса йўқ», деди. Конференция давомида у Фаластин, Иордания, Сурия, Ливан ва ҳатто Саудия Арабистони ҳудудларини ўз ичига олган «Буюк Исроил» деб номланган харита осилган минбардан нутқ сўзлади.

Сешанба куни Кан радиоэшиттириш корпорациясининг хабар беришича, Исроил хавфсизлик аппарати Смотричнинг сўзлари Рамазон ойи олдидан Исроил, Иордания ва Миср ўртасидаги хавфсизликни мувофиқлаштиришга таъсир қилиши мумкинлигидан хавотирда.

Кан ҳисоботига кўра, Смотричнинг баёноти Исроил учун катта аҳамиятга эга бўлган Иордания билан алоқаларга путур етказиши эҳтимоли бор. Шунингдек, шу ой Ақаба ва Шарм аш-Шайхда бўлиб ўтган хавфсизлик йиғилишларида эришилган хавфсизлик чораларига таъсир қилиши ҳамда ХАМАС исломий қаршилик ҳаракати билан музокараларда воситачилик қилаётган Миср билан алоқаларга зарар етказиши мумкин.

Смотрич Тел-Авив 1979 йилда Қоҳира билан имзолаган тинчлик шартномасига қаршилигини билдирган. Шунингдек, у Исроилнинг собиқ бош вазири Менахем Бегин Миср билан шартнома имзолаб, Синайдан воз кечиб, хато қилган, деб ҳисоблайди.

Смотричнинг баёнотларидан сўнг Иордания Ташқи ишлар вазирлиги Исроилнинг Аммондаги элчисини чақириб, унинг сўзларига норозилик билдирди. Бошқа давлатлар, жумладан, АҚШ, Франция, Саудия Арабистони ва БАА унинг сўзларини кескин қоралади.