Суриянинг БМТдаги элчиси Башар ал-Жаъфарий Хавфсизлик Кенгаши йиғилишидаги чиқишида АҚШнинг янги маъмуриятини Суриянинг гази ва нефтини талашни тўхтатиш ҳамда аскарларини у ердан олиб чиқиб кетишга чақирди. 

Элчининг таъкидалашича, янги президент Жо Байден АҚШнинг Сурия бўйича сиёсатини ўзгартириши зарур. У АҚШни Суриядаги урушдан фойдаланган ҳолда унинг бойликларини, хусусан, нефт ва газини талашда айблади. 

“АҚШнинг янги маъмурияти зўравонлик ва босқинчилик актларини ва менинг мамлакатимнинг бойликларини талашни тўхтатиши, босқинчи кучларини у ердан олиб чиқиши, айирмачилар, босқинчилар ҳамда Суриянинг суверенитети, бирлиги ва ҳудудий яхлитлигини таҳдид солувчи уринишлари қўллашни бас қилиши зарур”, – деди ал-Жаъфарий.  

Шунингдек, элчи АҚШ ва Европа Иттифоқининг санкциялари Суриядаги гуманитар вазиятни ёмонлаштираётганини таъкидлади.