Трамп: “Эрон олов билан ўйнашяпти”

15:25 03.07.2019 1262

АҚШ президенти Дональд Трамп Эронни яна бир бор огоҳлантириб, бойитилган уран ишлаб чиқариш бўйича қоидаларга риоя қилишга чақирди. Бу ҳақда DW хабар бермоқда.

“Биласизларми, сизлар нима билан ўйнашяпсизлар? Менимча, олов билан ўйнашяпсизлар”, – деди Трамп 1 июль куни.

Трамп шу куни аввалроқ Эрон раҳбарлари ўз позициясини ўзгартирмагунча уларга максимал даражада босим ўтказилишини маълум қилди. АҚШ раҳбариятининг фикрича, озроқ бойитилган уран ишлаб чиқариш бўйича Эрон билан тузилган битим хато эди.

АҚШ Давлат котиби Майк Помпео эса Эрон халқаро ҳамжамиятни ўз ядровий дастури билан шантаж қилишда ва минтақа хавфсизлигига таҳдид яратишда давом этаётганини таъкидлади.

Эслатиб ўтамиз, Эрон 3,67 фоизгача бойитилган уран миқдорини 300 килограммдан оширганини маълум қилди. Атом энергияси бўйича халқаро агентлик ҳам Эроннинг кам бойитилган уран бўйича чекловдан ошганини тасдиқлади.

Теҳрон ва Вашингтон ўртасидаги ихтилоф Эрон ядровий келишув бўйича мажбуриятларнинг айримларини бажаришни рад этганидан кейин янада кучайди. АҚШ ушбу келишувдан 2018 йилнинг майида чиққан ва Эронга нисбатан санкцияларни тиклаган.  

Azon.uz янгиликларини Telegram'да ҳам кузатиб боринг!