Қирғизистон раислигида 26 июл куни Чўлпон-Ота шаҳрида Туркий давлатлар махсус хизматлари конференсиясининг 24-йиғилиши бўлиб ўтди, дея хабар бермоқда “Кабар” расмий ахборот агентлиги.

Учрашувда Озарбайжон, Қозоғистон, Туркия, Ўзбекистон ва Қирғизистон махсус хизматлари раҳбарлари ва вакиллари, шунингдек, Россия ва Венгрия махсус хизматлари делегациялари Конференцияда кузатувчи сифатида иштирок этди. 

Унда Яқин Шарқ ва Афғонистондаги террорчилик фаоллиги зоналаридаги мавжуд вазият шароитида туркий давлатларда хавфсизлик ва барқарорликни таъминлаш соҳасида махсус хизматларнинг ўзаро ҳамкорлигининг долзарб масалалари кўриб чиқилди. 

Конференция иштирокчилари терроризм ва экстремизмнинг тарқалиши билан боғлиқ Афғонистон ва Сурия қуролли тўқнашуви ҳудудидан келиб чиқувчи террорчилик таҳдидларини маҳаллийлаштириш бўйича жавоб бериш ва ўзаро ҳамкорлик механизмларини келишиб олдилар. 

Учрашув доирасида Қирғизистон президенти Садир Жапаров туркий давлатлар махсус хизматлари раҳбарлари билан учрашди. 

Жапаров туркий давлатлар манфаатларига дахлдор ташқи таҳдид ва таҳдидларга қарши биргаликдаги ишларда махсус хизматларнинг яқин ҳамкорлиги ва саъй-ҳаракатларини бирлаштириш муҳимлигини таъкидлади. 

Туркий давлатлар махсус хизматлари конференсияси 1998 йилда ташкил этилган.