Ҳелсинки ўз ваъдаларини бажариш бўйича аниқ чоралар кўрганидан сўнг, Туркия унинг НАТОга аъзо бўлиш бўйича аризасини ратификация қилишни бошлайди, деди жума куни Туркия президенти Ражаб Тоййиб Эрдоған.
Эрдоған финляндиялик ҳамкасби Саули Ниинисто билан ўтказган матбуот анжуманида Туркия Швеция билан терроризм билан боғлиқ масалалар бўйича музокараларни давом эттиришини ва Швециянинг НАТОга аъзо бўлиш истаги бевосита кўриладиган чораларга боғлиқ бўлишини айтди.
“Ниинисто билан учрашгандан сўнг парламентимизда Финляндиянинг НАТОга кириш жараёнини ратификация қилишни бошлашга қарор қилдик”, деди Эрдоған ва парламентнинг Туркияда 14 май куни бўлиб ўтадиган сайловлар олдидан аризани қўллаб-қувватлашига умид қилишини қўшимча қилди.
НАТОга аъзо 30 та давлатнинг парламентлари янги аъзоларни ратификация қилиши керак.
Туркия ва Венгрия шу пайтга қадар Финляндия ва Швецияиннг НАТОга киришини ёқламай келаётганди.
"Венгриянинг қонун чиқарувчи органи энди 27 март куни Финляндиянинг НАТОга киришини ратификация қилиш учун овоз беради ва ҳукмрон кўпчилик партия блоки бу таклифни бир овоздан қўллаб-қувватлайди", деди жума куни ҳукмрон партиянинг парламент гуруҳи раҳбари Фидес Reuters агентлигига берган интервьюсида.
НАТО Бош котиби Йенс Столтенберг Туркиянинг қарорини олқишлади. "Бу Финляндия хавфсизлигини мустаҳкамлайди, Швеция хавфсизлигини мустаҳкамлайди ва НАТОни мустаҳкамлайди", деди у.
Британия ҳукумати эса ўз баёнотида "Швециянинг НАТОга тез кириши учун аниқ йўл харитаси керак" дея таъкидлади. Ниинисто “Туркиянинг қарори Россия билан энг узун чегарага эга Финляндия учун “жуда муҳим” деди.
Аммо Эрдоғаннинг ёнида турган Финляндия бош вазири алянсга қўшилиш жараёни “Швециясиз тўлиқ бўлмайди”, деди.
Швеция “террорчиларни” қўллаб-қувватламоқда
Анъанага кўра нейтрал давлатлар Финляндия ва Швеция 2022 йил февралида Россия Украинага бостириб кирганидан кейин НАТОга аъзо бўлиш учун ариза берган, бироқ кутилмаганда Туркиянинг эътирозларига дуч келган.
Анқара террорчи деб атайдиган курд жангарилари Стокҳолмдан бошпана олганини айтади. Швеция бу айбловларни рад этади.
Эрдоған жума куни ўтказган матбуот анжуманида Туркия Стокҳолмга 120 нафар “террорчи” рўйхатини жўнатгани ва уларнинг ҳеч бири экстрадиция қилинмаганини айтди.
“Бош вазир яхши одам, лекин улар бизга бу террорчиларни бизга топширмагунча, Швецияга нисбатан ижобий муносабатда бўла олмаймиз”, деди Эрдоған.
Туркия ҳукумати террорчи гуруҳ деб ҳисоблайдиган Курдистон ишчилар партиясининг (КИП) Стокҳолмдаги намойишлари, шунингдек, YPG етакчиларининг Швеция давлат телевидениеси орқали берган интервьюларидан норози.
Шу ҳафта бошида Швеция Бош вазири Улф Кристерссон, агар Туркия унинг мамлакатига НАТОга киришга тўсқинлик қилаверса, Финляндия НАТОга Швециясиз қўшилиши мумкинлигини айтди.
ўтган ёзда Мадридда НАТО раҳбарлари Швеция ва Финляндияни альянсга таклиф қилган саммитда бу икки давлат ҳамда Туркия тегишли масалалар бўйича меморандум имзолаган эди. Туркия энди Финляндия Мадрид саммитида берган ваъдаларини бажаришига ишонади.
