Украина Европа Иттифоқига аъзо бўлиши зарур ва келгусида ўзини НАТО аъзоси сифатида кўради. Украина президенти Владимир Зеленский Литва Ташқи ишлар вазири Габриелюс Ландсбергис билан учрашувда ана шундай деди. 

Зеленский Украинанинг НАТОга қабул қилинишини, шунингдек, унинг суверенитети ва ҳудудий яхлитлигини қўллагани учун Литвага миннатдорчилик билдирди. 

Шунингдек, президент Украинанинг “Шимолий оқим – 2” лойиҳасига қарши ва Европада энергетика хавфсизлигини асраш бўйича позициясининг қўллаб-қувватланишини муҳим деб ҳисоблашини айтди. “Қримнинг вақтинчалик оккупацияси, Донбассдаги уруш ва Европада энергетика хавфсизлиги туфайли санкция сиёсати учун миннатдорчилик билдираман”, – деди Зеленский. 

Маълумки, “Шимолий оқим – 2” Россия газини Болтиқ денгизи орқали Германияга етказиш лойиҳаси ҳисобланади. Украина мазкур лойиҳага қарши чиқмоқда. Мамлакатнинг собиқ президенти Пётр Порошенко “Шимолий оқим – 2” Кремлнинг геосиёсий лойиҳаси эканлигини ва бундан мақсад Европадаги ҳамжиҳатликни йўқ қилиш бўлишини айтган эди.