Назм

Уйғурларим

2194

Туркистондан қудрат кетди, фикрат кетди,

Чўлпон кетди, Соғунийу Фитрат кетди.

Келаверди бу миллатга саф-саф даҳо,

Барин ютди зулм пуркаган аждаҳо.

Кетди кўзи очиғларим, буюкларим,

Йиғлаб-йиғлаб қолди кўкси куюкларим.

 

Уйғур оғам, на кўмакка ярар бўлдим,

На корингни, на ҳолингни сўрар бўлдим.

Сен ҳам қўли боғлиқ бўлдинг, мен ҳам боғлиқ,

Сен ҳам кўкси доғлиқ бўлдинг, мен ҳам доғлиқ.

Тилим қани, ҳолингни бир сўрай билсам,

Қўлим қани, ҳимоянгга ярай билсам.

 

Жаҳолатга паноҳ бўлган, ай заминим,

Бу зулмга борми тўхтов, борми тиним.

Туркистон юрт тупроғини булғамишлар,

Заминимнинг кўкрагига қадаб нишлар.

 

Туркистонни бўлиб-бўлиб хўрладилар,

Истеҳзоли кулиб-кулиб хўрладилар.

Қондош деган бир-биридан ёт бўлганда,

Осон кечди, битта-битта зўрладилар.

 

Темур кўрса кулмайдими ҳолимизни,

Бунча ширин кўрамиз шу жонимизни?

Оғасини, инисини ахир инсон

Ит тагига ташлаб қўйган қайси замон?

Бир-бирига эш бўлмайин турса агар,

Бир бўларми туркий миллат – жон жигарлар!

 

Ҳақ мазлумга нажот йўлин кўрсатгувчи,

Сабил кетмас иймон кучи, виждон кучи.

Уйғуримга Аллоҳ ўзи ёрдамчидир,

Сабр берсин, жон жигарим, озроқ чида…

Кўргуликлар ўтар кун ҳам яқиндир-о…

Бу хўрликлар битар бир кун, иншааллоҳ.

 

Зулумотнинг адоғига етгунча йўл,

Бардошли бўл, бардошли бўл, бардошли бўл…

…Туркистондан қудрат кетди, фикрат кетди,

Чўлпон кетди, Соғунийу Фитрат кетди.

Туркистонни Роббим ўзи яна сийлар,

Келар яна Фитрат, Чўлпон, Соғунийлар.

Хуршид АБДУРАШИД

УЛАШИНГ:

Теглар:

Мавзуга доир:

БМТда ўнлаб давлат Хитойдан уйғурларнинг ҳуқуқларига ҳурмат кўрсатишни талаб қилди

1030 10:00 31.10.2019

Шарқий Туркистонда мозорлар бузиб ташланиб, ўрнига хиёбонлар барпо этиляпти

1673 10:05 10.10.2019

«Шарқий Туркистонда даҳшатли қатағон бўляпти»

5409 17:10 26.09.2019

«Уйғур ректорни қатл қилманг!»

2276 18:35 12.09.2019

“Шарқий Туркистондаги мажбурий меҳнатдан Хитой фойда кўрмоқда”

1045 19:30 24.08.2019

Хайрли кун, Брюссель! Салом, уйғурлар геноциди!

3770 12:30 07.08.2019
« Орқага