Олий Мажлис Қонунчилик палатасида Жиноят кодексига ўзгартириш киритиш орқали жиноий жавобгарликка тортиш ёшини ўн уч ёшдан ўн тўрт ёшга кўтариш масаласи кўриб чиқилмоқда.

Ўзбекистон Республикаси Президентининг 2021 йил 9 августдаги “Бола ҳуқуқларининг кафолатларини таъминлаш тизимини янада такомиллаштириш тўғрисида”ги  фармонига мувофиқ жиноий жавобгарликка тортишнинг энг кам ёшини ўн тўрт ёш қилиб белгилаш таклиф этилган эди. 

“Хориж мамлакатлари, хусусан, Германия, Италия, Испания, Япония ва МДҲ мамлакатлари жиноят қонунчилигида жиноий жавобгарликка тортишнинг энг кичик ёши сифатида ўн тўрт ёш ҳисобланади. Айтиш керакки, мазкур ўзгаришларни инсонпарварлик йўлидаги яна бир қадам дейиш мумкин”, – дея ёзади депутат Расул Кушербаев Телеграмдаги каналида.

Эслатиб ўтамиз, амалдаги қонунчиликка кўра, жиноят содир этгунга қадар ўн уч ёшга тўлган шахслар жавобгарликни оғирлаштирадиган ҳолатларда қасддан одам ўлдирганликлари учунгина жавобгарликка тортилади.