Новороссийск божхона бошқармаси ходимлари бир тоннадан ортиқ қуритилган исириқни таркибида наркотик моддаси бор деб эълон қилди.

“Гиёҳванд модда”лар божхоначилар томонидан Ўзбекистондан темир йўл орқали келган контейнердан топилган. У ерда яна  қуритилган мевалар, ёввойи наъматак, идиш-товоқлар, зиғир мойи ва қуритилган шифобахш ўтлар бўлган. Юк қуруқ юк ташувчи кемада Яқин Шарқ давлатларидан бирига жўнатилиши керак эди.

Божхона кўригидан ўтказилганда Осиё мамлакатларида очиқ ўсувчи кўп йиллик ўсимлик Россия Федерациясида назорат қилиниши керак бўлган ва Россия Федерацияси Ҳукуматининг қарори билан тасдиқланган гиёҳвандлик воситалари, психотроп моддалар ва уларнинг прекурсорлари рўйхатига киритилгани маълум бўлган. 

Исириқнинг умумий оғирлиги 1184,44 кг ни ташкил этди.

Мазкур ҳолат юзасидан Россия Федерацияси Жиноят кодексининг 229.1-моддаси (гиёҳвандлик воситалари, психотроп моддалар, уларнинг прекурсорлари контрабандаси) 1-қисми бўйича жиноят иши қўзғатилган.