Яман армияси, охирги 24 соат ичида Мариб шаҳрида хусийларга тегишли 2 та учувчисиз ҳаво воситаси (дрони) уриб туширилганини билдирди. 

Бу борадаги баёнот Яман қуролли кучлари матбуот маркази томонидан тарқатилди.

Баёнотга кўра, сўнгги 24 соат ичида Мариб шаҳрининг жанубида хусийларга тегишли иккита дрон уриб туширилган. 

Ямандаги Эрон томонидан қўллаб-қувватланган хусийлар 7 октябрь куни Саудия Арабистони ва БАА нишонларни бомбардимон қилишдан тортинмасликлари билан таҳдид қилишди. 

2014 йилдан бери Яманда қуролли тўқнашувлар давом этмоқда, унда бир томондан “Ансоруллоҳ” (хусийлар) шиа ҳаракати исёнчилари ва Яманнинг ағдарилган президенти Али Абдуллоҳ Солиҳ тарафдорлари, бошқа томондан эса, Президент Абдураббу Мансур Ҳодий ҳукуматига содиқ қўшинлар иштирок этмоқда.   

Хусийлар мамлакат пойтахти Сана шаҳри ва бошқа қатор ҳудудларни назорат қилади. 

Саудия Арабистони бошчилигидаги араб коалиция кучлари 2015 йилнинг март ойидан бери хусийларга қарши курашда Яман ҳукуматини қўллаб-қувватлаб келади. 

БМТ ҳисоботларига кўра, уруш бошланганидан 2021 йил охиригача Ямандаги уруш бевосита ёки билвосита 377 минг кишининг ҳаётига зомин бўлган. 

Дунёнинг энг қашшоқ давлатларидан бири Ямандаги гуманитар инқироз ўта хавфли даражага етди.