Бошингизга ташвиш тушганида, ҳаётнинг икр-чикирлари сизни домига тортганда...

16:00 10.06.2019 701

Қуръони Каримда сабр Пайғамбар ва элчиларнинг сифати экани ҳам зикр қилинади. Аллоҳ таоло хабар бериб айтадики: “Исмоил, Идрис ва Зулкифилни (эсланг). Барчалари сабр қилувчилардандир” ("Анбиё" сураси 85-оят).

Бошингизга ташвиш тушганида, ҳаётнинг икр-чикирлари сизни домига тортганда, инсонларни нодонлик ва жаҳолат ботқоғидан имону ҳидоят нурига олиб чиқиш йўлида Тоиф шаҳрига борган, аммо у ерда қабул қилинмай тошлар бўрони остида ковушлари қонга тўлиб қайтган, она юрти Макка эшиклари ҳам унга ёпилган Зотни эсланг.

У инсон сизу бизга сабру-қаноатда энг яхши намунадир.

Арзимаган муваффақиятларингиз олдида мағрурланиб, мақтовлар эшитишни истаб қолганингизда, “Маддоҳларни юзига тупроқ сочинглар”, деган раҳнамонинг камтарлигини ёд этинг.

Ҳақиқат қидириб, йўлда ёлғизлигингиздан шикоят қилганингизда, гўдаклигидаёқ етимликнинг аччиқ азобини тотган Муҳаммад Мустафо соллаллоҳу алайҳи васаллам бардошидан ибрат олинг.

Тансиқ таомларнинг хушбўйларидан бошингиз айланганида, биргина хурмо билан рўза тутган Пайғамбарингизни ҳам бир эслаб қўйинг. Шунда бу ўткинчи дунёнинг қийматини, ўзингизга берилган умрнинг қадрини англаб борасиз.

Бекобод тумани “Улуғбек” жоме масжиди имом-хатиби Х. Холбоев

Azon.uz янгиликларини Telegram'да ҳам кузатиб боринг!